2008ko abuztuan hil zen Antton Pebet pilotaria, istripuz. Iparraldekoa zen izatez, baina lotura berezia zuen Villabonarekin. Iñaki Lizaso billabonatarrarekin bikote osatuta jokatzen zuen maiz. Lotura horrek ekarri zuen 2009an Antton Pebeten omenezko pilota txapelketa abiaraztea.
Gazte eta nagusi, elkarrekin
Zazpigarren edizioa du aurtengo txapelketak, eta indartsu dator gainera. Iñaki Lizaso eta Eneko Maiz antolatzaile taldeko kide dira eta haiek eman dituzte txapelketaren nondik norakoak: “Lehen edizioetan, maila ezberdinetan banatzen genuen txapelketa. Azken urteetan ordea, eredu berri baten aldeko apustua egin dugu. Promesen eta nagusien mailako pilotariekin osatzen ditugu bikoteak. Beste txapelketa askotan parte hartzerik izango ez luketen gazteei aukera hori eskaintzea garrantzitsua dela iruditzen zaigu. Helduekin aritzean, asko erakusteko aukera izaten dute gazteek”.
Eskualdeko ordezkariak
Eskualdeko pilotariak ere arituko dira Antton Pebet txapelketan. “Asteasuko Elizegi, Labaka zizurkildarrarekin bikote osatuta arituko da. Gaztea da Elizegi, baina aukera ematea erabaki dugu”, azaldu du Lizasok. “Urbieta asteasuarra ere arituko da, Bikuñarekin bikote osatuta. Behar Zana elkarteko bi kide ere arituko dira: Munduko azpitxapeldun geratu den Eneko Maiz, eta Arkaitz Esnaola txaramarra”, gaineratu du.
Abenduaren 5ean hasiko da txapelketa, bi aurrekanporaketekin. 19:00etan hasiko dira partidak, Bearzana pilotalekuan. Abenduaren 14 eta 15ean jokatuko dituzte final-laurdenak. 19:00etan hasiko da lehia abenduaren 14an, 11:00etan abenduaren 15ean. Abenduaren 23an, igandearekin jokatuko dituzte finalerdiak. 11:00etan hasiko dira partidak eta bertan erabakiko da zein bikote sailkatzen diren abenduaren 29ko final handirako.
Finala, abenduaren 29an
Abenduaren 29a gorriz markatutako eguna izango da inguruko pilotazaleentzat. Izan ere, hiru partida izango baitira gozagarri. “Geroz eta gehiago dira esku pilotan dabiltzan emakumeak. 17:30etan, emakumeen eskuz binakako partida izango da gozagarri. Mendizabal eta Larrarte, Arrillaga eta Arrizabalagaren aurka arituko dira. Ikuskizun polita eskainiko dute, ziur”. Partida hori amaitzean, joko-garbi partida izango da. Iñaki Lizasok azaldu duenez, “iazko finalaren atarian antolatu genuen lehendabizikoz, eta sekulako ikuskizuna eskaini zuten. Partida haren errebantxa antolatu dugu aurten. Ikusleek gozatu egin zuten partida harekin, eta gozamen hori errepikatzea nahi genuke”. Antton Pebet txapelketako finalak itxiko du arratsaldea.
Bearzana pilotalekuaren goikaldea itxita jokatuko dute aurtengo Antton Pebet txapelketa. “Eguraldi hotza badago, berogailuak ekarriko ditugu, pilotalekua goxatzeko. Ikusleak eta pilotariak eroso egotea da helburua”.
Sarrerarik ez
Sarrerarik ez da ordaindu behar Antton Pebet txapelketako partidak ikusi ahal izateko, eta hala izango da aurten ere. “Modu horretan , jendea gaztea erakarri nahi dugu pilotalekura. Saskiak zozketatzen jarraituko dugu, diru-iturria suposatzen duelako guretzat. Horrez gain, eskertu egin behar da urtero-urtero babesle ezberdinek ematen diguten laguntza. Txapelketa hau antolatzeak baditu bere gastuak, eta laguntzaile horiek gabe, ezingo genioke aurre egin. Eskertzeko modukoa da haien babesa”, azpimarratu du Iñaki Lizasok.
Pilotalekura hurbiltzeko gonbita luzatu die zaletuei Lizasok: “Bikoteak ahalik eta gehien orekatzen saiatu gara, partidak ere orekatuak izan daitezen. Txapelketa polita izango dela iruditzen zaigu. Gerturatu daitezela pilotaz gozatzera. Pilotari onak kantxaratuko dira, gozatzeko aukera polita eskainiko du txapelketak”.