Goxatzeko errezetak

Curry begetalaren errezeta Maddi Etxeberria larrauldarraren eskutik

Gaurkoan Maddi Etxeberria larrauldarra curry begetalaren errezetarekin datorkigu; errezeta osasuntsua eta dieta beganora moldatuta. Gainera, arrozarekin laguntzeko janari perfektua izan daiteke.

Osagaiak (4 lagunentzat):

  • Kipula erdia
  • Alberjini erdia
  • 2 azenario
  • Piper berde erdia
  • Kalabazin txiki bat
  • Koko esne lata erdia (200 ml)
  • 50 gramo lenteja gorri
  • Curry hautsa
  • Ura
  • Gatza
  • Oliba olio birgin extra.

Nola egin:

  1. Eltze batean, oliba olio txorrotada bat berotu eta kipula eta azenarioa (zati ertainetan) erregosi 5 bat minutuz.
  2. Kalabazina, alberjinia eta piperra zati handietan moztu eta eltzera gehitu.
  3. Ura bota, barazkiak erdiraino estali arte, gutxi gora behera.
  4. Gatza bota eta irakiten utzi 10-15 minutuz.
  5. Lenteja gorriak erantsi eta irakiten utzi lentejak egin arte.
  6. Koko esnea eta curry-a erantsi (nik 3 koilarakada erantsi dizkiot, baina gustuen arabera gehiago edo gutxiago bota daiteke).
  7. Irakiten eduki gutxienez 30 minutuz, edo gustuko loditasuna eduki arte.

Oharra: Arroz integralarekin zerbitzatuta, nahasketa perfektua lortzen da.

Euskal Herrian ez da oso ohikoa sukaldean espeziak erabiltzea, eta egia da orokorrean asko kostatzen zaigula zapore berriak gure dietan sartzea. Hala ere, egia da bidaiatzearen eta atzerriko gastronomiaren jatetxeen ondorioz, espezia hauen erabilera etxe askotan nabarmenki igo dela azken urteetan. Curry-a ez da espezia bat, espezia askoren nahasketa, baizik, eta Indian dauka jatorria. Curry-aren osagai nagusietako bat kurkuma da, ezaguna bere hanturaren (inflamazioaren) aurkako gaitasunagatik. Beste alde batetik, curry-ak digestioa errazten lagun dezake, baita infekzioak saihestu ere. Hala ere, egia da curry mota asko daudela, eta bakoitzaren konposaketa ezberdinak, propietate ezberdinak esleitzen dizkiola nahasketa bakoitzari.

Prestatu dudan platerean proposatutako barazkiei dagokienez, erabat aldagarriak direla esan behar dut; baita dilistak ere. Edozein barazki-nahasketa erabili daiteke, barazki bakarrarekin egin, dilisten ordez garbantzuak edo babarrunak erantsi… Probatu, esperimentatu, dastatu… eta gozatu!

AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!