Udalaren esanetan, azken egunetako bilakaera positiboa izan bada ere, azken datuen arabera, Urnietak 354,32ko tasa metatua du , "ezarritako helburutik (60ra jaistea) oso urrun". Bide beretik, Gipuzkoako inzidentzia-tasa "kezkagarriagoa" dela jakinarazi du Udalak: 563,53 puntukoa da.
Egoera horretan, Jorge Segurado Urnietako alkateak azken ahalegina eskatu die herritarrei, azken egunetan emandako hobekuntzari jarraipena emateko eta tasa ahalik eta gehien murrizteko: "Datozen asteotako bilakaera erabakigarria izango da, eta ezin gara lasaitu, izan ere, apur bat despistatzen garenean egoerak okerrera egiten du berehala". Horrela, beste behin, erantzukizunez jokatzea eskatu du: "Jendea jakitun da egoera zail baten aurrean gaudela eta guztion
osasuna jokoan dagoela. Gehienek zuhurtziaz jokatu dute: ezarritako neurriak errespetatu dira, eta espero dut aurrerantzean ere herritarrek jarrera bera izatea".