Erremontea

Ansa eta Labaka azpitxapeldun sagardoaren txapelketan

Urrizak eta Zalduak irabazi zuten Sagardoaren txapelketa Ansa-Labaka bikotearen aurka (30-22). Gauzak horrela, Bereziartua sagardotegiak eman du garaikur preziatua etxera. 

Partida oso berdindua izan zen eta Erremontari saioaren ikusleentzat partida bizia. Maila beretsuan aritu ziren Urriza eta Ansa aurrekaldean; Zalduak ere borroka polita izan zuen Labakarekin atzean.
Lehen tantoetan 4-0 aurreratu ziren Urriza eta Zaldua, baina Ansak eta Labakak berehala eman zioten buelta markagailuari eta 4-5 jarri ziren aurretik. 15-15eko berdinketa iritsi arte aldaketa asko egon ziren markagailuan eta bikoteek bere mementoak eduki zituzten. Bapatean, bost tantoko aldea lortu zuten Bereziartuako ordezkariek eta abantaila mantentzea lortu zuten; alderik handienarekin itxi zuten finala (30-22).
 
Ansak eta Labakak ez zuten partida txarra jokatu, baina memento erabakiorrean ezin izan zuten aurrerapausoa eman. Urnietarrak 13 tanto egin zituen; hitz gutxitan, aurrelarien arteko finala izan zen. Labakak ongi eutsi zuen eta bi tanto egin zituen sakez, baina ez zuen Zaldua menderatu. 
 
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!