Elkartasun eguna izan zen atzo, Urnietan, Jon Lizarribar herrikidearen eta Ruben Gelbentzu andoaindarraren aldeko babesa erakusteko. "Elkartasunak batzen gaitu" lemapean, makina bat ekintza izan ziren, arratsalde osoan. Halere, iragan asteartean ekin zioten egitarauari "Hitz egin dezagun errepresioaz" hitzaldiarekin, AKAB-eko kideen eskutik.
Arratsaldeko 18:00tan eman zitzaion hasiera ekimenari, Matxo tabernatik udal frontoira egindako trikipoteoarekin. Jarraian, 19:00tan, erremonte jaialdi girotua ikusteko aukera izan zen: Goikoetxea eta Zubiriren aurka aritu ziren Loitegi eta Ansa. Borobiltzeko, elkartasun mokadu musikatuarekin amaitu zuten eguna.
