Datorren larunbatean, eta arratsaldeko 5etan hasita, agur ekitaldia egingo da Amaia Agirre mendizalearen ohoretan, Urnietako San Joan plazan. Fitz Roy mendia eskalatu ostean istripua izan zuten, eta elur-jauzi batek bere baitan jasota ditu Amaia Agirre eta Iker Bilbao. Ekitaldiaren helburua, Urnietako herriak familiari elkartasuna eta maitasuna adieraztea izango da, Amaiari agur esatearekin batera.
Hauxe izango da ekitaldia. Lore eskaintza bat egingo da, baita agur dantza bat ere. Hurbileko zenbait pertsonek hitza hartzea espero da: Familiako kideak, Amaiaren lagunak, Egape ikastetxekoak, herriko mendizaleak… Andoaingo musika eskolako abesbatzak kanta bat abestuko du.
Azkenik, antolatzaileek omenaldira agertzeko gonbitea luzatu nahi diete herritar eta mendizale guztiei.