Itzalitako kalabazak piztu dituzte, gaur iluntzean urnietarrek. Gau Beltza ospatu dute herrian, Salestarrak-Magale ikastetxeak antolatuta. Hala, bigarren urtez, etxeko ohitura zaharrak berreskuratu eta iluntasuna bizitzeko parada izan da Urnietan. Aurpegiak zurituta edota zapi zuri batekin burua estalita gerturatu dira bizilagunak Etxeberri plazara arratsaldeko 18:30ean, egitarau oparoari ekiteko prest.