Bai, bai, ongi irakurri duzu: lehen aldiz, martxoaren 19an, asteartearekin, jasoko dute urnietarrek lekukoa. Hernanitik etorriko da, Oztaran aldetik, 21:38tan, zehatz mehatz, eta, herriko kaleetan barrena ibili ondoren, Lasarte-Oriaranzko bidea hartuko du “Harro Herri” lemapean, Kostegi parean.
Handik egun batzuetara sartuko da berriro eskualdean lasterketa, hain justu ere, martxoaren 23an. Kasu honetan, andoaindarrak izango dira protagonista, lehenik: Adunatik iritsiko zaie euskararen aldeko aldarrikapena, arratsaldeko 15:57tan. Ohiturak agindu bezala, ongi-etorri beroa emango diote herriko euskaltzaleek lasterketari, ospakizun-giroan murgilduta. Behin gorputza berotuta, urnietarren txanda izango da, bigarrengoz. 16:42ean zeharkatuko dituzte herriko kaleak hizkuntzaren aldeko korrikalariek: San Juan, Aranzubi, Idiazabal... Hernanitik igarota, Donostiaranzko bidea hartuko du lekukoak, biharamunean, hamaika eguneko erronkari Baionan amaiera emateko asmoz.