Aurreikusitako 340 etxebizitzetatik, % 55 babes ofizialekoak izango dira, % 20 tasatuak eta gainerako % 25a etxebizitza libreak. Era berean, Urnietako Udalak aderazi bezala, "lursail bat utzi zaio Eusko Jaurlaritzari Egape Ikastolako DBHko ikastetxea eraikitzeko".
Bestalde, "zaintza-eredu berriari jarraituz" adinekoentzako egoitza bat egongo da, 120 plazarekin, eta Gipuzkoako Foru Aldundiak kudeatuko du. Dagoeneko onartu da lurzoruaren lagapena, eta lankidetza-protokolo bat sinatu du Urnietako Udalak.
Zabaletako trafikoa
Zabaleta inguruko trafikoak eragindako albo-kalteei irtenbidea jarriko diela adierazi du Urnietako Udalak. Hirigunearen mugetatik kanpo bide alternatibo bat eraikiko dutela jakinarazi du. Lotune berri bat jarriko da Langardako bidegurutzetik, biribilgune baten bidez, garatutako eremuarekin eta Lasarte-Oriarako bidearekin lotzeko: "Abenduko osoko bilkuran bertan, konpromisoa hartu zen aurten bidea ahalik eta azkarren egiteko, legezko izapideek ahalbidetzen duten neurrian. Udala lehentasunez ari da lantzen jarduketa hori".