"Ez gara jaitsiko" ikuskizun berrienarekin Urnietara itzuliko da Katxiporreta pailazoen konpainia. AEK euskaltegiak, Aiurri astekariak eta euskaltzaleen komunitateak antolatu du emanaldia, eta sarrerak ostiraletik aurrera salgai ipiniko dira Urnietako BKN kafetegian (Sarobe ondoan), Andoaingo Ernaitza liburudendan eta Aiurriko egoitzan.
Pandemia iritsi arte, Porrotxek eta konpainiak Urnietan saioa eskaintzen zuten urtero. Eta, beti, Aiurriren eskutik. Oraingoan, berriz, Sarobe antzokian ariko dira. Martxoaren 15ean izango da, ostiralarekin, eta bi saio egingo dituzte. Lehena, 17:00tan. Eta, bigarrena, 19:00tan.
Euskal Herriko konpainia ezagunena, beraz, iristear da. Zeri buruzkoa da ikuskizun berriena? Honatx aurrerapena: "Marimotots zuhaitz baten adaburura igo da, han goitik lurra hobeto ikusteko. Pirritxek eta Porrotxek atzetik jarraituko diote. Eta zuhaitzez zuhaitz eta adarrez adar, espero gabeko lekuetara helduko dira”.
Familian ikusteko aukera paregabea. Ingurumenarekiko arreta areagotzeko aproposa.
Argazki-bildumak Andoaingo Basteroko saioa jasotzen du.