Tomasenak hainbat lorpen egin ditu azken urtetan. Oraingoan, urrezko domina lortu du Dohan, 3 kilometroko itsas zeharkaldia eginda, 75-79 urte arteko mailan; ostiralean hasi zen Munduko Masters Aquatics 2024 txapelketan parte hartu zuen urnietarrak. Tracy Clarkson australiarra zuen aurkari, baina, azken momentuan, ez zuen parte hartu. 3 kilometroko zeharkaldia 1h:22:54-eko denboran egin zuen.
Gibraltargo itsasartearen zeharkaldia
Horrez gain, beste hamarnaka garaikur eta domina lortu ditu Tomasenak azken urtetan. Azken, lorpen ikusgarria Gibraltargo itsasartearen zeharkaldia izan zen; izan ere, errekorra egin zuen, itsasartea igerian zeharkatu duen pertsona helduena izateagatik, 77 urterekin.
Hori guztia nahikoa ez eta datorren urriaren 12an Bocaina Erronkari eutsiko dio. Zeharkaldi hori Lanzarote hegoaldean hasten da, Hondartza Zurian zehazki, eta Fuerteventura iparraldean amaitzen da (Corralejo).