Aurrez aurreko pediatria-zerbitzurik gabe daude urnietarrak. Pazienteek Heraniko osasun-etxera jo behar dute horretarako. Hala, Osakidetzarekin harremanetan jarri da Urnietako Udala, dagoen premia azaltzeko asmoz. "Hark adierazi du aldi baterako neurria dela", jakinarazi du Urnietako Udalak, "eta zerbitzua presentziala izango dela, ahal bezain laster".
Herrian sortu den kezkaren aurrean, udalak argitu nahi du Urnietako pediatria-plaza ez dela inoiz ezabatu nahi izan: "Ez da murrizketa bat, baizik eta bestela sortutako egoera puntual bat, eta ez dago espezialistarik zerbitzu hori nahi bezain azkar betetzeko". Bilera bat eskatu du erakundeak Eusko Jaurlaritzako Osasun Sailarekin.