“Catania-50 milioi segundu” ipuina estreinatuko du euskaraz Gipuzkoako Abesbatzen Federazioak. Bada, Juan Kruz Igerabidek euskaratutako obraren entsegu irekian parte hartuko dute Lourdes Iriondo musika-eskolako zenbait ikaslek, Bea Garcia musika-hizkuntzako irakaslearen eskutik. Saroben egingo dute hitzordua, hilaren 30ean, arratsaldeko 17:30ean: orotara, 150 haur arituko dira abesten oholtza gainean, zortzi instrumentistaz, bi bakarlariz eta zuzendari profesionalez lagunduta.
Haurren koroak dinamizatzea du xede Gipuzkoako Abesbatzen Federazioak koordinatutako eta antolatutako ekimenak. Euskal Herriko Abesbatzen Elkartearen "Korukiri" kanpainaren barruan kokatu behar da egitasmoa eta Joan Vives Catalunyako egileak idatzi zuen ipuin horren musika Bartzelonako auditoriorako.
