Miren Martiarena Barkaiztegi Euskadi Buru Batzarreko kide izendatu dute

Aiurri 2025ko mar. 31a, 17:47

EAJ-PNV alderdiak IX. Kongresua amaitu berri du Donostian. Aitor Esteban izango da jeltzaleen buruzagi berria eta Euskadiko Buru Batzarreko kide izango da Miren Martiarena Barkaiztegi urnietarra.

Urnietako jeltzaleek albistea pozarren hartu dute: "EBBko burukide aukeratu izanak harrotasunez bete ditu Urnietako jeltzaleak, urnietar bat datozen lau urteetan alderdia gidatuko duen taldeko kide izatea ospatzen baitute. Zorionak Miren eta eskerrik asko hartu duzun konpromisoagatik. Batasuna da Indarra, alderdiaren diskurtsoa babesteko hautagai aproposa zara".

Miren Martiarena Barkaiztegi (Urnieta, 1981) Gobernu Irekiaren eta Gobernu Onaren zuzendari kargua bete du orain arte Eusko Jaurlaritzako Gobernantza, Administrazio Digital eta Autogobernu Sailean. Gardentasuna eta herritarren parte-hartzea sustatzea izan da bere ardura. 2011-2016 urteetan, Gizarte Ekintza eta Berdintasun zinegotzia izan zen Urnietako Udalean.

AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!