Denboraldiaren azken txanpan sartua da Urnietako Artola Harategia senior taldea, eta ez edozein modutan gainera: joan den asteburuan berdinketa lortuta, ziurtatuta dauka, jada, playoff-ean lehiatzeko txartela. Bukaera biribila eman nahi diote ligari eta motibazioz erantzungo diote erronkari jokalariek. Tartean dira Beñat Errazkin Bermejo, Iosu Pagola Artola eta Unax Jimenez Zumalakarregi urnietarrak.
Joan den asteburuan berdinketa lortu ondoren, ospakizunerako tartea hartu al du taldeak?
Iosu Pagola: Oraindik ez dugu ezer ospatu, harrituta gaude joan den denboralditik aurtengora eman dugun aldaketa ikusita. Iaz, azken postuetan izan ginen, jaitsieratik gertu. Beraz, ilusioz bizi dut, polita baita playoff-a jokatzea.
Beñat Errazkin: Betiko ilusioarekin hasi genuen denboraldia denok, guztia emateko gogoz. Ez dakit zortea izan den-edo, baina ederki gabiltza.
Unax Jimenez: Talde gaztea gara eta aurreko denboraldian, beharbada, esperientzia falta geneukan. Aurten, aurrerapauso hori eman dugu. Gainera, askok txikitatik jokatu dugu elkarrekin.
I.P.: Bai, egia da, beste taldeekin alderatuta, jokalari gazteak daude gurean. Gazteenetarikoa nintzenean ni, 40 urteren bueltako taldekidea neukan, 33 urteko jokalari pare bat... Orain, 27 ditut nik eta beteranoena naiz.
Ez zen norgehiagoka erraza izan, txapelketako talderik indartsuenetariko bat eduki baitzenuten aurrez aurre, Donibane Kalaburtza.
U.J.: Oso ondo atera ginen kantxara hasieratik, lauzpabost goleko aldea aterata. Martxa mantentzea zen helburua; azkenean berdinketa lortu genuen, baina oso pozik gaude, playoff-a jokatzeko aukera izango dugulako.
I.P.: Oso pareko gabiltza guztiok ligan denboraldi osoan. Bosgarren gaude, baina hirugarrenetik bi puntura. Beste denboraldi batzuetan izan da nabarmendu den talderik, baina, aurten, ez da horrelakorik eman hain argi.
B.E.: Donibane Kalaburtzaren kontrako joaneko partida da horren erakusle, esaterako. Galdu egin genuen lehen itzulian eta gehien sufritu dugun partida izan zen. Eta, itzuleran, berdinketa lortu dugu. Edozer gauza gerta daiteke.
I.P.: Donibane Kalaburtza da niretzat ligako talderik onena: jokalari beteranoak ditu, goiko ligetan ibilitakoak dira... Talde konpletoa da, baina, begira, berdinketa lortu genuen.
Harmailaren berotasunak lagundu al zion taldeari partidaren neurriari eusten?
O.J.: Berezia da beti Urnietan jokatzea, bultzada ematen digute partida ikustera datozen gurasoek, lagunek eta zaleek.
I.P.: Entrenatzaile zaretenon kasuan, ilusioa egiten du zuen jokalariak ikustera etortzea
Zein giro nabari da orain aldagelan? Anbizioz begiratzen al diozue datorrenari?
I.P.: Anbizio hori egon, badago. Ilusio handia egingo lidake igoera fasera klasifikatzea berriro. Oso giro ona dugu, aurten. Partida txarretan tentsiorik sortu bada, gure artean hitz egin dugu, eta, nire ustez, oso giro positiboa izan dugu aldagelan.
B.E.: Oso ondo ulertzen dugu elkar taldean. Iritsi gara iritsi garen tokira, eta asko hitz egiten dugu, astez aste. Joan den asteburuko partidaren ondoren elkarrekin joan ginen afaltzera, adibidez. Horrelako momentutan nabari da gogoa, emozioa.
I.P.: Nabari da motibazioa, ez baita ligako edozein partida jokatzea bezala. Berezia izango da. Zerbait dugu jokoan eta denboraldian egindako lan guztiagatik iritsi gara hona. Gainera, jende asko dago taldean, nik uste, ez duena sekula playoff-ik jokatu.
Oraindik ez da denboraldia amaitu: asteburu honetan, Urola E.K. Laztimendiren pistan izango zarete. Estualdi handiagoa dute aurkariek, jaitsiera izan dezakete jokoan. Lasai al zoazte zuek? Gozatzeko helburuz?
I.P: Lesiorik ez edukitzea da helburua... (barreak) Oso argi dugu hori! Irabaztera joango gara, bai, baina garrantzitsuena bajarik ez izatea da.
U.J.: Gutxiago jokatu dutenei, baita bigarren taldeko jokalariei ere, minutuak emateko aukera izango da. Ondo datorkigu, gainera, astebete geldirik ez egoteko, erritmoa ez galtzeko.
Denboraldiko azken txanpan sartuta, eta atzera begirako ariketan, nolakoa izan da Urnieta Artola Harategiaren ibilbidea?
U.J.: Aurreko denboraldia nola bukatu genuen ikusita, aurtengo helburua ligan mantentzea zen. Partidaz partida joan gara jokatzen. Lesioak ere egon dira; adibidez, hilabete egon naiz geldirik eta orain bi baja ditugu. Ez gara asko, hamabi fitxa ditugu lehen taldean. Zenbait partidatan, bigarren taldeko jokalariak igo behar izan dira. Dena dela, lortu dugu eta ilusioarekin gaude, dena emateko prest.
I.P.: Arrasateko partida dukat gogoan: bederatzi jokalari joan ginen eta, hamargarren minutuan, bat lesionatu zitzaigun. Bada, irabazi egin genuen eta izugarrizko motibazioa izan zen.
Aipatu duzuen bezala, zorrotza bezain estua da liga, eta denboraldi osoan erregularra izatea eskatu dizue. Zein izan da sekretua?
I.P.: Inolako espektatibarik ez genuenez, Unaxek esan bezala, partidaz partida aritu gara eta lasai hasi genuen denboraldia. Zarautz, adibidez, irailean, lehen edo bigarren postuan zegoen eta, orain, jaitsieratik oso gertu dago. Geurea egin dugu, inorengandik ezer espero gabe.
Aurrera begira, zein izango da igoera fasean lehiakorrak izateko gakoa?
U.J.: Ziurrenik berriro ere Donibane izango dugu aurkari. Badakigu hor egongo garela, maila erakutsiz gero. Irabazteko aukerak ditugu.
B.E.: Esperientzia badugu beraien aurka; badakigu zer dagoen. Guk dugu zer hobetua, guk emango dugu sorpresa.
I.P.: Beraiek gelditu dira bigarren, guk ez dugu ezer galtzeko. Beren alde egon dadila presioa, gu sorpresa ematera goaz.