Urnietako Udalak zabaldutako datuen arabera, ekainaren bigarren hamabostaldian, 14.108 sarrera zenbatu ziren kiroldegian, eguneko 1.300 pertsona baino gehiagoko kopuruekin: hala, bisita horien % 80 inguru urnietarrak izan dira, % 14,4 Andoaingoak, % 4,6 Lasarte-Oriakoak eta % 0,6 Usurbilgoak. Bada, jakinarazi du langile-kopurua handituko duela, "zerbitzua ahalik eta modurik onenean eta baldintzarik egokienetan eskaintzeko".
Era berean, gaitzespen irmoa erakutsi du Urnietako Udalak zenbait erabiltzailek erakutsitako "gizalegearen aurkako" jokabideengatik: "Aldageletan kaka egitera ere iritsi da, eta horrek erakusten du zein puntutara iritsi diren egoera horiek". Horren aurrean, instalazioak "behar bezala" erabiltzeko deia luzatu du, "gizalegez eta gainerako erabiltzaileekiko errespetuz".