Gozatu ederra ari dira hartzen urnietarrak Etxeberri plazaren bueltan: atzotik hasita, hiru eguneko ospakizun-giroa lehertu da bertan. Txanbolin txistulari bandaren dianaren ondoren, lasterketa egin dute goizean herritarrek: auzuneari bi itzuli emanda, oilaskoz mozorroturiko antolatzailearen atzetik ibili dira korrikalariak. Ondoren, jolaserako tartea zein aurpegia margotzeko aukera izan dute bizilagunek, urtero Super H elkarteak antolatu ohi duen txokoan.