Neurri gisa, aldaketa batzuk izango dira trafikoan, obrek irauten duten bitartean: batetik, Idiazabal-San Juan bidegurutzera iristen diren ibilgailuek nahitaez jo beharko dute San Juan kaletik Etxeberrirantz. Izan ere, ezin izango da Idiazabaletik aurrera jarraitu, ezta Lizardi kalerantz igo ere. Bestetik, Maximo Yurramendi kaletik edota Aranzubi kaletik jaisten diren autoek derrigorrean irten beharko dute Andoainerako noranzkoan, debekatuta egongo baita Belandi kalera edo Idiazabal kalera Hernanirantz sartzea. Azkenik, Lizardi kalearen noranzkoa aldatu egingo da, eta Akan edo Pintore kaletik datozen ibilgailuek Lizardi kaletik Zabaletarantz egin ahal izango dute aurrera.
Autobus-zerbitzua
Udalak jakinarazi du Idiazabal kalea moztuta dagoen bitartean bi autobus-geltoki baino ez direla egongo herrian: Elkarteen Etxearen ondoko biribilgunean eta Ermotegi-Langardako biribilgunean.