"Egia jakitea gizarte osoaren eskubidea da". Mezu horixe plazaratu zuten igandean Zizurkil Goian Joxelu Gerestari egin zitzaion omenaldian.
Estatu aparatuen indarkeriaren biktima izan diren batzuk ez dutela aitortzarik jaso salatu dute. "Euskal Herriko gatazkaren testuinguruan, pertsona asko hil dira azken mende erdian bizi izan dugun konfrontazio armatuaren ondorioz. Zorionez indarkeriaren biktima batzuek dagokien aitortza jaso badute ere, ez da horrela izan estatu aparatuek praktikara eramandako indarkeriak kaltetu dituztenen kasuan". Euskal Herriko zenbait erakunde publikok bide horretan urratsak eman badituzte ere, oraindik bide luzea dagoela egiteke adierazi zuten.
Pairatutako indarkeriaren jatorria edozein dela ere, eta pertsonaren kondizioak edozein direla ere, giza eskubideak pertsona guztientzat "berdinak" direla argi utzi nahi izan zuten omenaldian.