Asteartean, abenduaren 10ean, Subcampeon Liburuaren aurkezpenarekin emango zaio hasiera Kirol Asteari. Ander Izagirre eta Zuhaitz Gurrutxaga izango dira protagonista Atxulondo Kultur Etxean, 18:30ean hasita.
Ostiralean, abenduak 13, bigarren urtez jarraian, Pirineos Mendi Film jaialdiko 2024ko film aukeratuen emanaldia izango da Atxulondon. Zinemaldi honek nazioartean aitortza handia duen mendiko zinemaren onena dakarki urtero, eta Zizurkilen edizio honetako lan aipagarrienak ikusteko aukera izango da aurten ere.
Larunbata izan ohi da Zizurkilgo Kirol Astearen egun nagusia eta hala izango da aurten ere. Egun osoan zehar egitarau oparoa eskainiko da herriko hainbat txokotan. 11:00etan hasiko dira ekintzak, Intxaur frontoian, ZEKek antolatutako herri kirol eta jolasekin. 16:00etan, kirolari gazteenak izango dira protagonista, Gipuzkoako eskolarteko pilota partidekin. Ondoren, 17:00etan, Joxe Arregi plaza bizikletez beteko da, Danena Txirrindularitza Elkarteak antolatutako bizikleta ginkanarekin. 18:30ean berriz, Neskide gorengo erregional taldeak Ilintxaren aurka jokatuko du.
Gauean, tradizio handiko Gau Krosaren txanda izango da. Ibontxo Gonzalezen omenezko lasterketa 22:30ean hasiko da. Aurretik, 21:30ean, haurren lasterketa egingo da eta 22:00etan gazteen mailakoa. Izen-ematea zabalik da www.herrikrosa.eus webgunean.
Igandean, berriz, Kirol Asteari amaiera emateko, 12:00etan, Joxe Arregi plazan, Denok Danena taldeak antolatutako Egarri HalterofiLia Trofeoa jokatuko da. Arratsaldean, 16:30ean, Intxaur frontoian, Ziotza eta Urnietako Pilota Elkarteko umeek neurtuko dituzte indarrak, eta 18:00etan, Danenako ohorezko kadeteek Añorgaren aurka jokatuko dute.
Maite Amenabar alkateak azpimarratu duenez, “herriko kirol eragileek, Udalarekin lankidetzan, lan handia egin dute egitarau zabal hau antolatzeko. Elkarte guzti-guztiak dira funtsezkoak horrelako ekintzak aurrera eramateko, eta Udalak eskerrak eman nahi dizkie, beste behin, giro paregabea sortuko duten egun hauek prestatzen laguntzeagatik”. Zizurkildar guztiak ekitaldietan parte hartzera ere gonbidatu nahi izan ditu Amenabarrek: “Herritar guztiei dei egin nahi diet ekitaldietan parte hartu eta kirolaz zein giro apartaz goza dezaten”.
Egitaraua
Abenduak 10, asteartea:
18:30: 'Subcampeon' Liburuaren aurkezpena, Atxulondo Kultur Etxean, Ander Izagirre eta Zuhaitz Gurrutxagaren eskutik.
Abenduak 13, ostirala:
19:00: Pirineos Mendi Film Festival. 2024ko film aukeratuen emanaldia Atxulondo Kultur Etxean.
Abenduak 14, Larunbata - 12 orduz kirolean:
11:00: Herri kirolak eta jolasak ZEKen eskutik, Intxaur frontoian.
16:00: Gipuzkoako eskolarteko pilota partidak, Intxaur frontoian.
17:00: Bizikleta ginkana, Joxe Arregi plazan, Danena Txirrindularitza elkartearen eskutik.
18:30: Neskide gorengo erregional taldea Ilintxaren aurka.
21:30: Haurren Gau Krosa.
22:00: Gazteen Gau Krosa.
22:30: Ibontxo Gonzalezen omenezko XXVII. Gau krosa.
Abenduak 15, igandea:
12:00: Egarri Halterofilia trofeoa, Denok Danenaren eskutik, Joxe Arregi plazan.
16:30: Ziotza eta Urnietako pilota Elkarteko umeen arteko pilota partidak, Intxaur frontoian.
18:00: Danena Ohorezko kadeteak Añorgakoen aurka.