Zizurkilgo Udalak Gipuzkoako Pilota Federazioarekin elkarlanean antolatu du pasaka txapelketa. Txapelketa apirilaren 5ean abiatuko da, eta finalak Maiatza Saltsan kultur egitarauaren baitan jokatuko dira, maiatzaren 25ean, eguerdiko 12:00etan.
“Zizurkil herri pilotazalea da, eta antzinako modalitate honen berri izan genuenean, Gipuzkoako Txapelketa gure herrira ekartzea aukera paregabea iruditu zitzaigun. Gainera, Zizurkilgo Zimiterioak pasakan jolasteko ezaugarri egokiak ditu, eta horrek ere erabakia erraztu zuen”, adierazi du Maite Amenabar Alkorta alkateak.
“Pasaka oso modalitate berezia da, eta Gipuzkoan oso toki gutxitan mantendu da bizirik. Oiartzunen eta Zizurkilen soilik jokatzen da gaur egun, eta horrek are bereziago egiten du”, azaldu du Iñaki Lizaso Gipuzkoako Pilota Federazioko lehendakariak. “Pasaka jokoa mantentzea gure kirolaren ondarea zaintzea da, eta herritarrak modalitate hau ezagutzera animatzen ditugu”.
Pasaka plaza librean jokatzen ez den joko zuzen bakarra da. Leku itxietan jokatzen da, hala nola arkupeak (zimitorioak edo udaletxeetako arkupeak), trinketeak eta frontoi motzak. Modalitate hau neguko joko gisa ezagutzen da, eta eskuz nahiz eskularru
motzarekin joka daiteke. Pilota sarearen gainetik pasa behar da, eta pilota goxoa erabiltzen da, trapu asko eta kizkirik gabea. Guantearekin jokatuz gero, pilota handiagoa izaten da. Sarea kantxaren erdian jartzen da, eta joko zuzen guztietan bezala, kintzekak kontatzen dira. Hala ere, pasakan ez dago arraiarik, laxoa, bote luzea eta errebotea ez bezala.
