Krosarekin eman diote hasiera ekitaldiari. Iratzarren parean hasi dira korrikalariak, eta bertan zuten helmuga. Kros ez konpetitiboa izango zela iragarria zuten eta halaxe izan da; gaurko helburua ez zen azkarrena izatea. Sailkapenik ez da egon, beraz, baina bai sariak.
Erraldoi eta ipotxen laguntzarekin abiatu dira korrikalariak, herriko kaleetan barrena.
Gazteen mailan, bi itzuli eman behar zizkioten ibilbideari eta, 10:03 denborara ahalik eta gehien gerturatu. Irteera puntuan kendu dizkiete ordulariak eta, erreferentziarik gabe egin behar izan dute korrika. Gazteen mailan, Aiur izan da finkatutako denborara gehien gerturatu dena.
Nagusien mailan, hiru denbora tarte zituzten finkatuta. 20:38 minutura gehien hurbildu dena Aitor Besance izan da. 25:08ko denboratik gertuen ibili direnak Unax eta Aritz izan dira eta, 30:38 denborara gehien hurbildu direnak, Urreta, June eta Urbizu izan dira. Giro ederrean joan da goiza Villabonako Kale Nagusian.