Ekainaren 14an Gipuzkoako Eskola Txikien Festa ospatuko dute Zizurkilgo herrigunean. Eta festa horren aitzakian, Mendigain eskolako kantu berria egin dute. Unai Mendizabal bertsolariak egin ditu hitzak, eta Loatzo Musika Eskolako Jon Oiarzunek osatu du doinua, eskolako gainerako irakasleekin elkarlanean.
Giro ederrean egin dute gaur ‘Mendigain gainean hegan’ kantuaren aurkezpena. Bertan ziren Mendigain eskolako komunitatea osatzen duten ikasle, irakasle eta familiak, Loatzo Musika Eskolako ordezkariak, kantuan parte hartu dutenak eta adin guztietako herritarrak.
Igotz Alkortak gidatu du aurkezpen saioa. “Miruaren hegaldia hasi genuenean esan genuen zer eta nola egin nahi genuen; euskaratik eta euskaraz, adin aniztasunari leku eginda eta herrian txertatuta. Hau ez da slogan hutsa; saiatzen ari gara Mendigain eskolatik, eta Gipuzkoako Eskola Txikien Festaren antolakuntza, modu horretara eragiten”.
Kantua osatzerako garaian, gertuko sarea baliatu dutela azpimarratu du Alkortak: “Xume egin dugu kantua. Herritar batek egin digu letra, Loatzo Musika Eskolak doinua, ikasle ohiak jarri ditugu kantuan eta gaur egun eskolako komunitatea osatzen dugunok egin ditugu koruak”. Adunako Elkar estudioetan egin dute kantuaren grabaketa eta, Andoaingo Zine eta bideo eskolako Xabat Minguez ikasleak atondu du bideoklipa.
Egileak
Unai Mendizabal bertsolari zizurkildarrak egin ditu kantu berriaren hitzak. Ikasleek ordurako egina zuten ideia zaparrada bat eta zertzelada haiei jarraitu zien Mendizabalek hitzak osatzerako garaian. “Mirua izango da eskola txikietako festaren irudi, eta horixe jasotzen du estribilloak, hitz jokoa eginez. Hegan egitearen amets hori irudikatu nahi izan dut kantuaren lehen zatian eta bigarrenean eskolaren bi oinarri azpimarratzen dira: euskara batetik, eta Mendigain eskolaren metodología berezia bestetik”.
Loatzo Musika Eskolatik, Miren Mujika Tolaretxipik hartu du hitza: “Zortzi herri txikiz osatutako musika eskola gara. Txikitasunetik, elkartuta, gauza handiak egin daitzekla sinesten dugu, eta kantuari doinua jartzeko erronka honi heldu genion. Emaitza txukuna izan dela esango nuke. Eskerrik asko esan nahi dizuegu antolatzaileei gurekin kontatzeagatik eta baita Loatzoko irakasle guztiei eta ordezkari politikoei ere, gauza txikietan sinesteagatik”.
Herritar ugari elkartu da Plaza Etxeberriko ekitaldia gertutik jarraitzeko eta, txalo zaparradaz hartu dituzte ‘Mendigain gainean hegan’ kantua eta bideoklipa. Ekitaldiari amaiera emateko, gainera, Bukalai dantza taldeko Maria Belokik espreski sortutako koreografia dantzatu dute eskolako ikasleek.
Jan-edanekin elkarrekin gozatuz amaitutzat eman dute ekitaldia.
Miruaren hegaldia abiadura bizian doa dagoeneko. Ekainaren 14an, Gipuzkoako Eskola Txikiak Zizurkilen elkartuko dira.
Kantuaren izenburua: ‘Mendigain gainean hegan’
- Hitzak: Unai Mendizabal
- Doinua: Jon Oiarzun
Musikariak:
Loatzo Musika Eskola
- Tronpeta: Onintza Erkizia
- Tronboia: Markel Uribarren
- Bateria eta saxofoia: Ixak Oiartzabal
- Gitarra eta baxua: Jon Oiarzun
Ahotsak
- Unai Mendizabal
- Alaitz Ormazabal
- Maria Lasa
- Maria Beloki
- Mikel Garin
- Mendigain Eskolako Komunitatea
Soinu Teknikaria: Elkar Estudioa- Victor Sánchez
Irudiak eta drona:
- Dabid Argindar
- Ainhoa Gil
- Xabat Minguez
- Nahia Alkorta
- Aratz Alkorta
Edizioa: Xabat Minguez
Mendigain gainean hegan
Hiru miru dirudigu
zeruz zeru zoro eran
Hiru miru dirudigu
Mendigain gainean hegan
Itxi begiak, zabal besoak
zer ikusten da han goitik
gure lagunen babes goxoak
hegarazten gaitu pozik.
Euri tantak zenbatzen eta
hodeien ertzak marrazten
ametsak ureztatzen eta
ezinezkoak ikasten.
Hiru miru dirudigu (…)
Gure eskolako horma zaharrek
hitz egin ahalko balute
lehen lapurtzen zituzten hitzek
garena egiten gaituzte.
Nola eginez ikasten dugun
ibilian ibilian
gauza handiak egiten dira
gure eskola txikian
Hiru miru dirudigu
zeruz zeru zoro eran
Hiru miru dirudigu
Mendigain gainean hegan
Geroa sortzen da orain!
