Asteartean, hilak 8, ospatu zen Zizurkilgo XVII. kros mistoa. Txikitxoenen artean korrikalari ugari animatu zen parte hartzera, eta animatzaileekin batera giro ederrean ospatu zen. 18:45ean hasi ziren txikienen karrerak, eta helduena 19:00ak puntuan abiatu zen. Euria hasiko zela bazirudien arren, krosa amaitu arte ateri eutsi zion.
Helduen kros mistoan 50 bikotek hartu zuten parte, eta Paula del Pozok (Alegia) eta Axier Mujikak (Ibarra) osatutako bikotea izan zen garaile, 45 segundoko aldearekin. Bigarren postua Idoia Nogalesek (Deba) eta Alberto Arberasek (Elgoibar) eskuratu zuten, eta hirugarrenean Irene Iturria (Bidania) eta Jesus Iturria (Bidania Goiatz) geratu ziren. Podiumera heldu ziren bikoteek Mahalako saski bana irabazi zuten. 5 Km luzerako lau itzuli zirkularreko ibilbidea egin zuten, eta korrikalariek abiadura handian ekin zioten lasterketa osoan.
Adin guztietako korrikalariek parte hartu zuten, eta horien guztien artean, amaieran, herriko tabernetan bi lagunentzako afariak zozkatu zituzten. Danenan bertan dutxatzeko aukera eskaini zitzaien, eta giroarekin aurrera jarraitzeko, barrikoteaz gozatzeko aukera eduki zuten.