Sanjuanak 2019

Bertso saio bikaina osatu zuten sei bertsolariek

Goi mailako bertso saioa abestu zuten Aitor Sarriegi, Agin Laburu, Andoni Egaña, Uxue Alberdi, Igor Elortza eta Onintza Enbeitak Goikoplazan. Punttuka bertso eskolako Unai Ormaetxea gai jartzailearen esanetara jarri behar izan zuten, eta aktualitatearekin zerikusia daukaten hainbat gairi egin zieten aurre.

Hainbat rol bete behar izan zituzten bertsolariek, umoreari eta hausnarketari bidea emanez: Alberdi marrazkilaria eta Elortza bezeroa; Elortza, beste alderdien paktuek baztertu duten alkategairik bozkatuena; Sarriegi eta Alberdi, aita-alabak, bideo jokoen inguruko eztabaidan; Enbeita, kritikak jasoko dituen arren iritzia emanez idazten jarraitu nahi duen kazetaria; Egaña eta Laburu, komenturik gabe geratu diren bi fraide; iritzi kontrajarriak Amancio Pradaren dohaintzaren aurrean, Alberdi alde eta Egaña aurka. Punttuka bertso eskolako haurrek ere hainbat puntu zirikatzaile jarri zizkien zenbait bertsolariei, tartean Egañari, bere burusoiltasuna dela eta. Momenturik xelebreena, gai jartzaileak sei bertsolariak puntuka librean jarri zituenean gertatu zen. Saioan zehar, bertsolariak nahastu samar ibili ziren, nork hasi eta nork buka garbi jakin gabe, eta elkarri traba eginez. Xelebrea bezain umoretsua irten zen saio hori, bertsolarien ofizioari esker.

Oso txalotuak izan ziren Enbeitak bota zituen hiru bertsoak, Ormaetxea gai jartzaileak honako gaia jarrita: “Zu kazetaria zara, badakizu idaztera zoazenak eztabaida piztuko duela, baina erabakia hartua daukazu. Berdin-berdin idatziko duzu”. Gogoan izan Enbeita albiste izan dela azken egunetan, Berria egunkarian egunero idazten duen zutabean Che Guevara auzitan jarri zuela-eta jaso dituen kritikengatik.   

 

Papera zuri dagoenean

bat ez dago beti lasai.

Polemikoak izan daitezke

ikusten diren mila gai.

Ta inguruan usaitzen dira

buelta-bueltaka hainbat sai.

Nor zertan ari den eta zeinek

hanka sartuko duen zai.

Hitz egiteko beldurrez baina,

enuke beti bizi nahi (bis)

 

Objetiboa izan nahi hortan

ez dakit zenbat alegin,

baina bizitza ikusten dugu

nork bere antijuekin.

Zalantzan jarri behar da dana,

maite duguna ere berdin.

Beti ezin da zalantzan izan

etorriko den horrekin,

ze egunero oheratzen naiz

ni neure buruarekin (bis).

 

Idatzi baino len erantzuna

zein izango den badakit.

Eta gainera emakume naiz,

beraz badakit zergatik.

Baina kontzientzi gogorra berez

nik zerietik dakarkit.

Idatziko dut uste dudana

beti lez erraietatik,

ta eguzkia aterako da

eguneroko tokitik (bis)

Erlazionatuak

Bertso saioa Andoaingo San Juan Jaietan

Andoain

Alberdik Elorzaren erretratua marraztu du eta ez du bere antzik.
Bertso saioa Andoaingo San Juan Jaietan

Andoain

Onintza eta Andoni bikote ohiak dira eta ligatzeko aplikazio batean ikusi dute berriz elkar.
Bertso saioa Andoaingo San Juan Jaietan

Andoain

Andoni Egaña burusoil, puntuka.
Bertso saioa Andoaingo San Juan Jaietan

Andoain

Aitor Sarriegi eta Uxue Alberdi, Aita eta alaba bideojokoetan.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!