Rosa Maria Suarez Zuloaga, Ignacio Zuloaga Eibarko margolari famatuaren biloba zen amaren aldetik. Bere aita, berriz, 50eko hamarkadan Algodonerako jabea izan zen Enrique Suarez zen. Azken urtetan, Pedrazako (Segovia) herrian dagoen gaztelu-museoaren kudeatzaile-zuzendaria izan da. Zuloaga margolariak (1870-1945) egin zuen kuadroen bilduma nagusia dago bilduta gaztelu horretan.
Rosa Maria Suarez pozarren agertu zen Basteron, martxoaren 5ean egin zen ekitaldian: “Hasieratik eduki nuen argi Andoainera hurbildu behar nuela, deitu zidaten une ber-beretik. Gaztetan, herrian bertan urte batzuk egin nituen gurasoekin batera, eta oso oroitzapen gozoak dauzka ordutik. Badakit Lucia, nire amak, oso harreman gizatiarra eduki zuela lantegiko emakumeekin”.
Basteroko erakusketarako, panpinen kotoizko zenbait oihal utzi zituen, bere garaian Algodoneran egin zirenak.