Renfeko trenbidea azpitik pasa eta Goiburu auzoa hasten den eremu horretan, Sagastiberri, Sagastiondo eta Goiburupe etxeen ondoan ikurrina handia masta baten muturrean topa daiteke aspalditxotik. Hain zuzen, 80ko hamarkadan zenbait auzotarrek jarri zuten, 36ko gerran ikurrinapean borrokan aritu ziren auzoko gudarien omenez. Aurtengo Aberri Egunean ikurrina berria jarri dute, haizeteen joan-etorriek hondatu samarra baitzeukaten aurrekoa.
Andoainen espazio publikoan zutik mantentzen den ikurrinik zaharrena dela diote auzotarrek, eta etorkizunean zaintzen segitzeko asmoa azaldu dute.
2012an argitaratutako erreportajean, ikurrina hori jartzeari buruzko azalpenak eman zituzten bizilagunek.
Goiburuko 36ko gudariei,, eta batik bat, Joxinixio Etxeberria "Merdillegi"ri buruzko biografia, Jonixio Pizkunde Zapuztua (Larramendi Bazkuna, 2016) saiakeran jasota dago.
