Claudia Alduncin Imaz Andoaingo Udal Musika Eskolan hezitako ikaslea da, eta Musikeneko goi ikasketak amaitu berri ditu; bi aste barru, karreraren amaiera gisa, musikari adituez osatutako epai-mahai baten aurrean errezitaldia egin beharko du, Donostian bertan. Hain zuzen, bere ibilbidean goren-goreneko hitzordua izango da Donostiakoa, eta atzoko saioak haren prestaketarako balio izan zion.
Alduncin Mikel Emezabal klarinete irakaslearekin hasi zen ikasten Andoaingo Udal Musika Eskolan, Erdi mailako ikasketak Francisco Escudero Kontserbatorioan atera zuen, eta azken urtetan, Musikenen egin ditu Goi Mailako ikasketak, Jose Luis Estelles eta Sergio Barranco irakasleekin.
Etorkizun handiko klarinete-jolea da; jada 17 urterekin, Euskadiko Musika Gazteen lehiaketan lehenengo saria eskuratu zuen haize egurrezko kategorian.
Alduncinek Amaia Zipitria Zugasti piano-jolea izan zuen bidaide atzoko kontzertuan. Donostian bizi den andoaindarra da Zipitria. Luis Fraca eta Myriam Ulanga irakasleekin egin zituen lehen urtetako ikasketak, eta ondoren Donostian, Baionan eta Rotterdameko musika eskoletan jarraitu zituen ikasketak; pianoko goi mailako titulazioa kalifikaziorik altuenarekin lortu zuen. Halaber, Ganbera Musika irakasle izateko titulua ere gradu amaierako ohorezko sariarekin eskuratu zuen.
Madrilgo Reina Sofia eskolan eta Alcala de Henareseko Unibertsitatean lan egina da, piano-jole laguntzaile gisa.
Espainiako estatuko auditorio garrantzitsuenetan eman ditu kontzertuak, eta baita atzerrian ere (Kroazia, Frantzia, Italia, Ingalaterra, Suitza…). Zenbait orkestratan kolaboratzaile moduan aritu izan da, hala nola, RTVE, ONE, Euskadiko Orkestra Sinfonikoa edo Bilboko Orkestra Sinfonikoa. Gaur egun, besteak beste, Donostiako Orfeoiko piano-jolea da.
