Sanjuanak 2022

Iaz desegin zen Triana kultur elkarteari esker oneko ekitaldia eskainiko zaio gaur

Triana elkarteko dantza taldea, 2018ko San Juan jaietan

Andaluziako kultura zabaltzea xede zuen Triana elkarteak iaz desegitea erabaki zuen, ia 30 urtetako ibilbidearen ostean. Urte horietan egindako lanari aitortza egiteko, omenaldia eskainiko zaio San Martin Tours parrokiako arkupetan gaur, arratsaldeko 19:30etik aurrera. Besteak beste, ibilbide hori islatzen duten argazki eta beste zenbait agirien erakusketa jarriko dute bertan.

Trianako elkarteko kideek urtetan bildutako agiritegia (argazkiak, kartelak, prentsa aipamenak, Joxe Mari Oiartzabalek elkartearentzat egindako abestiaren partitura…) udal artxiboan utzi zituzten, eta hain zuzen, artxibo horrek hartu du erakusketa prestatzeko ardura.

Gogoan hartu behar da elkarteak iaz hartu zuela desegiteko erabakia, hainbat arrazoi zirela medio: belaunaldi berrien falta, pandemia, bazkideak murriztea, egoitzaren gastuei ezin aurre egin…

AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!