“Kontuan hartuta aurreko urtetan gazterik ez dela joan Zumeatarratik, badauzkagu arrazoiak soberan pozik egoteko”, halaxe adierazi du Alberdik.
Honako bederatzi gaztetxo aritu ziren lasterka Txingudin: Iñigo Lertxundi, Ainhoa Herrero, Odile Igarriz, Iker Garcia, Hanna Flores, Oinatz Zatarain, Julen Vicente, Jokin Sanchez eta Hugo Blanco. Alberdik gaineratu duenez, “Egundoko ilusioarekin joan ziren denboraldiko lehenbiziko lasterketara, eta ederki gozatu zutela esango nuke, nahiz eta ibilbideko zati luzea lokatzetan egin behar izan”.
Abenduaren 6an, Orion izango dute bigarrengo lasterketa, eta hitzordua noiz iritsiko irrikitan daude, Alberdik ziurtatu duenez.
Hain zuzen, Zumeatarra elkartean, gazteei begirako atletismo eskola 2013ko denboraldian sortu zen, eta hasiera-hasieratik gozamenaren kontzeptua nabarmendu nahi izan du Alberdik. “Lehia baztertu, eta atletismoarekin gozatzen ikasi dezaten bultzatu dugu Zumeatarra elkartean beti, eta horri eusten diogu. Filosofia hori sustatzen dugu gurekin hasten diren gazteekin; gero, urtetan aurrera heldutasun maila batera iristen direnean, beraiek erabakiko dute atletismoan sakontzen segi nahi duten ala ez”.
Zumeatarrako atletismo sailak 30 haur mugitzen ditu aurtengo denboraldian, 7 urtetik hasi eta 14-15 urte bitartekoak. “Eskarmentuak adierazten digu zail-zaila dela adin horietako gaztetxoentzat erakargarria izatea atletismoa. Nahiko bakarka egin beharreko kirola da, sakrifikatua, eta nahiago izaten dute taldean egiten diren eta tartean baloia daukaten kirolak, hots futbola, eskubaloia, saskibaloia…”.
Helduak ere Txingudiko lasterketan
Elkarteko beste hiru korrikalari helduagoak ere aritu ziren lasterka Txingudiko krosean: Aimar Sukuntza eta Unai Somavilla 20 urtez azpikoen mailan, eta Javi Menta seniorren mailan. Azpimarratzekoa da Mentak lortu zuen bigarren postua.