II. Errepublikari, 1936ko kolpe militarrari eta ondorengo giza-zapalketari lotutako bisita gidatua antolatu du Oroituz, Andoainen elkarteak larunbat honetan. Bisita gidatua Goikoplazatik abiatuko da goizeko 10:00etan, eta Alfaro parkean kokatzen den Goiztirian, arimaren garrasia monumentuan amaituko da. Bi orduko iraupena izango du, gutxigora behera. Frankismoko biktimen alde jarduten duen elkarteak adierazi duenez, andoaindarrek aipatu aldi historiko horiek nola bizi eta sufritu izan zituzten kontatuko da bisitaldian.
Oroituz, Andoainen elkarteak, besteak beste, urtero frankismoko biktimen aldeko omenaldi-ekitaldia antolatu ohi du Goiztirian arimaren garrasia eskulturaren aurrean. Aurtengo ekitaldiko argazki eta bideo bilduma, ikusgai, klik eginda, hemen.
Maiatzari begira, berriz, beste bi ekitaldi antolatu ditu. Lehenbizi "Jaungoikoagatik eta Espainiagatik eroritakoen Buruntzako gurutze frankista" izenburuko liburua kaleratuko du, eta hilaren 18rako, bigarren bisita gidatua prestatu du, Buruntzako tontorrera, hain zuzen.
