“Lazkaoko Martxa” Jabier Muruamendiarazek sortu zuen 2002an, eta Andres Barandiaranek letra jarri zion hurrengo urtean. Herriko jaietako danborradetan jotzeko prestatu zuten, eta atzotik jada bandako instrumentistek ere badauzkate partiturak eskura.
Joxe Mari Oiartzabal musika andoaindarra konposatzailea izateaz gain, abestien moldatzailea ere bada, eta ez nolanahikoa, antza denez. Izan ere, handik eta hemendik eskatzen baitiote Bandako hainbat instrumentuentzat egokitu ditzan abestiak.
Atzo, Lazkao Txiki Musika Eskolak Musikako Bandak oroigarria eman zion, esker onez. Abestia estreinatzeko unean, Eneritz Jauregi zuzendariak Oiartzabali batuta eman zion, pieza zuzendu zezan.
Jauregi, musikari eta zuzendari
Eneritz Jauregi flauta-jole andoaindarra Lazkao Txiki Musika Eskolan 2019n sortu zen Bandako zuzendaria izateaz gain, eskolako zuzendaria da eta flauta eta flautinako irakaslea. Bestalde, Getariako Musika Banda ere zuzentzen du, eta Hernaniko Musika Bandan flauta-jole bakarlaria da.