Badira urteak Andoainen lanean ari zarela, maskoten artean. Noiztik, zehazki?
1992an ekin genion lanari, beraz, 32 urte dira. Aurreko mendetik gaude hemen, kar kar.
Bezero fidel ugari izango dituzue, honezkero.
Hala da, bai. Hasiera-hasierako bezeroekin jarraitzen dugu lanean. Animalia txikiekin ari gara lanean, ia erabat. Katuak eta, gehienbat, txakurrak.
Joera aldaketa izan da maskota aukeratzeko orduan?
Zainketari dagokionez, jabeak geroz eta gehiago eta hobeto zaintzen du maskota. Kontzientzia hartu jendeak. Kalean kaka jasotzen duen geroz eta jabe gehiago daude, nahiz eta alor horretan lan asko egiteke dagoen.
Maskota bat izateak sortzen duen ardurari dagokionez, hobetzen ari da gizartea.
Txakurrak eta katuak, zein artatzen duzu gehien?
Txakurra da, oraindik orain, maskoten artean nagusi.
Urteotan internet sarean zabaldu den salmentak kalte handia egin dizue?
Bai. Eta gehiago esango nuke, informazio-iturri nagusi bilakatu da eta askotan maskotaren jabeak arreta gehiago jartzen dio youtuber edo instagramer bati, albaitariari baino.
Zer esan zenieke bezeroei?
Profesionalen lana balioan jarri behar da. Medikura presentzialki joaten gara, bada, gauza bera egin beharko genuke maskotekin. Egoera beretsuaz ari gara.
"Bulo", esames edo "fake news"engan arreta jartzea kaltegarria da, garaiotan.
