Erakusketak unibertsitatean ateak gaur ilunabarrean itxiko dituen arren, Real Oviedo taldearen Carlos Tartiere estadioan epe mugarik gabe ikusi ahal izango du publiko zabalak, Langararen familiak eta Oviedo Errege Fundazioak gaur izenpetuta daukaten hitzarmenaren arabera.
Mundu mailako futbolari handia
Real Oviedo Fundazioak eta Asicom Iberoamerikar Fundazioak antolatu dute erakusketa. Beren hitzetan, “Isidro Langara, futbolean doktoratua eta golak egiteko artean bikain cum laude, Oviedoko Unibertsitatean sartu da orain, Real Oviedoko futbolariaren figura publiko zabalari hurbiltzen dion erakusketa antologiko handi baten bidez”.
Futbolaren historian goleatzailerik handienetako da Isidro Langara Galarraga, zalantzarik gabe. Oviedon egin zituen bere kirol ibilbideko urterik gehienak, eta ez daukate batere ahaztuta; aitzitik, izugarri maite dute.
Real Oviedo Fundazioko ordezkariek erakusketaren irekitze ekialdian gogorarazi zutenez, “Langara Futboleko Historia eta Estatistikako Nazioarteko Federazioak Espainiako golegilerik onena izendatu du. Berea da, gaur egun ere, Espainiako Lehen Mailan partida bakoitzeko sartutako golen batez besteko onena eta Espainiako selekzioarekin sartutako golen batez besteko onena. Espainiako futbol maila goreneko hiru partidatan hat-trick-ak lortu dituen Ligako historiako futbolari bakarra da. Eta inork ez zuen berak bezain neurketa gutxi behar izan Espainiako Lehen Mailan ehun gol lortzeko”.
Andoaingo erakusketa
Iazko otsailean ipini zuten Basteron golegile andoaindarren gaineko erakusketa, eta orduan ikusi ahal zen materiala (argazkiak, prentsa-hemeroteka, trofeoak, intsigniak...) eta Real Oviedo Fundazioak daukan guztia elkartu dute, unibertsitatean aipatu erakusketa antolatzeko.