Resurreccion Maria Azkuek, Ezkurrako Sor Antonia monja baten eta Amasako Karmele Mendiluzeren oroimenetatik jaso zituen “Andoaingo elizan” abestiko zenbait estrofa “Cancionero Vasco” liburuan XX. mende hasieran, eta arrasto hori dute abiapuntu ETB1eko “Sos Kantak Arriskuan” saioko hiru aurkezleek.
Azkenean, 15 estrofako abestia osatzea lortzen dute, eta Andoaingo hainbat abeslari kantuan jartzen dituzte.
Lehenengo Karlistaldian, 1837ko irailaren 14an, Andoainen karlisten eta liberalen artean gertatu zen borrokaldi odoltsua du hizpide 15 estrofako abestiak, hain zuzen.
Saioan, Mikel Alberdi Zumalakarregi museoko kideak eta Joseba Salbador, Leire Ibañez eta Karmele Otaegi herriko historialariek borrokaldiaren eta abestiaren gaineko xehetasunak ematen dituzte. Bestalde, Haritz Nuñezek, bere arbaso Felipe Camarero Nuñezek O´Donell jenerala hizpide izanda 1837an bertan idatzi zuen eguneroko-eskuizkribua ere erakusten die.
Hirukote aurkezleak herriko zenbait merkatariekin edukitako solasaldiak ere ikusi litezke saioan.