Asteasuko Goibailaran egun handia izaten da uztailaren 18a. Santa Marina eguna ospatzeko elkartzen dira ermitaren inguruan. Meza, txupinazoa, herri-kirolak... izan dituzte goizean eta, arratsaldean kalejiran atera dira auzoan barrena, erromeria giroan. Irazu eta Peñagarikano bertsolariak eta trikitilarien doinuak batu zaizkie auzotarrei.
17:30etan abiatu dira Santa Marina ermitaren ingurutik eta, Andazarrateko gainean egin dute lehen geldialdia. Dantza, umorea eta jan-edanak izan dira nagusi bertan. Ondoren, auzoan barrena zabaldu dute festa-giroa, ermita ingurura itzuli arte.
Ostiral, larunbat eta igandean ere izango dute zertaz gozaturik.
