Hona sailkapena, bakoitza bere puntuazioekin:
Jokin Uranga 333,5
Andoni Mujika 304,5
Adur Gorostidi 296,5
Imanol Irazustabarrena 293,5
Ion Beloki 283,5
Gontzal Belategi 262,5
Belokiren jarraitzaile mordoa izan zen Errezilen, Andoainetik joanda. Herriko ostatuan bazkaldu zuten denek ere Belokirekin batera, eta ondoren saiora joan ziren, sei bertsolarien saioaz gozatzeko gogoz. Urnietatik ere joan ziren bakan batzuk, Mujika animatzera.
Mujika herriko langilea, Uranga eskultorea
Andoni Mujikak eta Jokin Urangak Errezilgo bertso ariketarik txukunenetakoa osatu zuten elkarrekin, entzuleen barreak eta txaloak eraginez. Iban Narbaiza aurkezleak hona zein gai jarri zien, zortziko txikian hiruna bertso kanta zitzaten: “Zu, Andoni, herri lanetan aritzen zaren langilea zara. Gaur eskultura bat jarri duzu herriko plazan. Lanak bukatu dituzunean, Jokin eskultoreak esan dizu alderantziz jarri duzula”.
Andoni Mujika:
Honek ematen zidan
nahiko errespeto.
Ustez lan denak nitun
hartu nik menpeko.
Hau jarri litekela
askozaz hobeto,
erreza ez zegoen
tankera hartzeko (bis)
Jokin Uranga:
Ni zure zain nengoen
bederatzitatik
ta hamabitan zatoz
lasai tabernatik.
Hau zergatik gertatu
zaigun bai, badakit:
hurrena jarri zazu
gosaldu aurretik (bis)
Andoni Mujika:
Ez da erreza lana
noiz zein jakitea
baina ez zazu hartu
halako pikea.
Alper-alperrik baita
ai, Jokin maitea,
ura pasata gero
presa egitea (bis)
Jokin Uranga:
Nahiz ta nik galdu dudan
haseran kontrola
fijatzen hasia naiz
aldrebes dagola.
Etzazula ezer egin
ez du ajola,
neuri ere gehiago
gustatzen zait hola (bis)
Andoni Mujika:
Hasieran bazegon
hainbeste problema
baina soluzioa
nabarmena dena
nik aukeratu det ta
aukerarik onena:
azpian jarriko da
neronen izena (bis)
Jokin Uranga:
Zerbait egingo ote deu
bi izen elkartzean
firma jarri dezagun
aukera hartzean.
Nirea aurrean ta
zurea atzean.
Baina aurrea zein da
aldrebes jartzean? (bis)
Beloki, minbizia gaindituta
Gaia jarrita, bi bertso nahi zuten neurri eta doinuan kantatu behar izan zuten sei bertsolariek. Belokik arratsaldeko bertso alerik egokienak burutu zituen orduan.
Hona gaia: “Urteetan minbiziaren aurka borroka egin ondoren, gaur eman dizute alta”.
Ion Beloki:
Minbizi txar bat etorri zen behin
nere gorputzan barnera.
Hartua nion aspaldidanik
nik neuk horretxen tankera.
Izorraturik iritsi nintzen
Onkologiko aldera,
baina halare gaurko honetan
bizirik atera gera.
Gauza bat behintzat ondo ikasi det:
egunero egin behar da aurrera.
Azkenerako hura bihurtu
zen niretzako kartzela.
Baina halare berde kolorez
pintatu nahi nuen gela,
bizi poz batek lagundu zidan
ezin ziteken bestela,
ta horren gaizki egon ondoren
nik pentsatu nuen bela:
egun bakoitza bizi behar da
azkena balitz bezela.
Puntuak jarrita, bi bertso
Bi puntu emanda bertsoa osatu beharreko ariketan, gai jartzaileak Mujikari herri kirolen gaia planteatu zion:
Gai jartzaileak:
Herri kirolek berriz
hartu dute fama
Andoni Mujika:
eta ibiltzen dira
herrietan barna,
ni askotan enazu
tartean izana.
Hortan harrapatzeko
izango da lana.
Gai jartzaileak:
Sasoian ote zaude
giza probarako?
Andoni Mujika:
Arpegiz nahiz ta naizen
ni nahikoa guapo
gorputzean kiloak
badauzkat sobrako
eta ariketa hoietan
nago lekuz kanpo.
Kartzelako gaia, binaka
Kartzelako ariketan bertsolariak bikoteka jarri zituzten, hiruna bertso hamarreko txikian kantatzeko. Gaia: "zuen bizitza osoko aurrezkiak sartu zenituzten inbertsio fondo batean, eta gaur jakin duzue guztia galdu duzuela”. Hona Uranga eta Belokik osatutako bikoteak egin zuen saioa:
Jokin Uranga:
Garai batean dena
koltxoian azpira,
guk beste leku baten
denak erretira.
Hamabi miloi sartu
nituen guztira
azkenean zer pasa
zaigun begira:
fondoa ta hondoa
gauza bera dira.
Ion Beloki:
Hasieran gu biok
ez ginen kezkatu
ta horretan zebiltzan
ia ia lau katu.
Nahiz eta bankeruak guk
nahi bai guk akatu
ezin degu oraintxe
horretan pentsatu.
Badakizu, bankuez
ezin da fidatu.
Grafikoei begira
enintzen aspertzen,
orain barruak dauzkat
amorruz lehertzen.
Zer gertatu ote den
Ari naiz aztertzen
norbaitek hartu ditu
edo ez dut ulertzen
dirua hola ta hola
ez da desagertzen.
Ion Beloki:
Bankuen kontu hori
ez da nobedade
eta egoera hau
bihurtu da grabe.
Baina elkarren ondon
gaude gu halare
ta arkitzen gera
ia ezer gabe.
Bankuak ingo al du
orain gure alde?
Jokin Uranga:
Txinotara nijoa
arren, konprenitu,
kaputxa ta pistola
nahi ditut aurkitu.
Bihar goizean goizik
banua abitu,
Jokinek hango denak
eramango ditu.
lapurrei lapurtzea
ez baita delitu.
Ion Beloki:
Soluzio bilatzen
gaur gau eta egun,
eta bankua degu
guztian errudun.
Ta tratatu gaituzte
gixaxoen modun,
baina guk euren kontra
ezin degu jardun.
Gure maitasunean
inberti dezagun.
Iraileko Gipuzkoako txapelketara begira
Maiatzaren 4an ekin zion sailkapen faseak, eta 84 bertsolari ari dira parte hartzen. Horietatik puntuaziorik altuena lortzen duten 34 bertsolariek eskuratuko dute irailean hasiko den txapelketarako txartela. Dagoeneko ospatu dira saioa gehienak; bi besterik ez dira geratzen, Bergaran eta Donostian igandean. Andoni Mujika urnietarrak badauka aukerarik sailkatzeko, baina azken bi saio horietan gertatzen denaren zain geratzen da.