Aldarrikapen berriak, Buruntza gailurrean

Aiurri 2025ko api. 4a, 12:31

Buruntzako gurutzea eraitsi zenetik, askotariko aldarrikapenen eta ikurren lekuko bihurtu da mendiaren gailurra. Hala, gaur goizean, masta berriarekin esnatu da tontorra: ikurrina ez ezik, bandera gorria ere bada zintzilik. 

Joan den otsailean argitaratutako artikulua gogora ekarrita, hainbat hamarkada egin behar da atzera Buruntzako ikurren abiapuntuarekin topo egiteko: 1939. urtean altxa zuten hamar metroko altuera zuen gurutzea. Xedea, garai hartan, oso zehatza izan zen, 1936ko uztailaren 18an Francoren aldeko kolpe militarrean parte hartu zuten hildakoak omentzea. Urteak joan eta urteak etorri, karga sinboliko ilun hura galduz joan zen, harik eta 2021eko abendua iritsi zen arte. Gurutzea eraitsi zuten, eta bota zutenek lehen lerrora ekarri zuten sinbolo handi horrekin nori egiten zitzaion gorazarre.

Hori horrela, 2022ko urriaren 1ean, gurutzearen oinarriaren gainean, abertzale talde batek ikurrina altxa zuen. Burnizkoak ziren masta eta ikurrina bera. Bada, 2023ko udaberrian, mastatik zintzilik bandera gehiago agertu ziren, 1936ko udan borrokan izan ziren komunistak, anarkistak eta errepublikazaleak gogoan hartzeko asmoz. Azken horiek ez zuten luzaroan iraun, ordea. 

Aurten, otsailaren 1ean eraitsi zen ikurrina zintzilik zeraman masta, abertzaleen haserrerako. Horrela, zenbait hilabetez apartkeo mugimendurik egon gabe, zeresana emango dute zutitu berri dituzten ikurrek. 

AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!