Egun horretan bertan, Eguzkik informazioa eskatu zion zentroa menpekoa duen Foru Aldundiko Sustapen Ekonomiko, Turismo eta Landa Ingurunearen Departamentuari. Ez agerraldiari eta haren ondorioei buruz bakarrik, baizik eta Zentroak nola funtzionatzen duen edo nola funtzionatuko duen ere bai. Sartzeko protokoloa nolakoa izango den, babestu gabeko espezie basatiak onartuko diren, itsas espezieak ere zainduko diren eta abar galdetzen genuen.
Izan ere, Urnietako Arizmendi finkan dagoen eta Igeldoko Arrano Etxea ordezkatuko duen Berreskuratze Zentroaren kudeaketa integraleko zerbitzua abenduan Aldundiak Arizmendi EABri (UTE) esleitu zionetik, ez da ia informaziorik izan. Hain zuzen, informazio falta nabari hori izan zen, Foru Aldundiak inaugurazio ofizialen bat egiteko asmoa zuenaren (hegazti-gripearen agerraldia zela eta, bertan behera utzi behar izan zen) berriarekin batera, idazki bat aurkeztera bultzatu gintuena.
Bi hilabete geroago, badirudi zorionez hegazti-gripearen agerraldia ez dela gehiago izan, baina oraindik ez dugu erantzunik. Oraindik ez dakigu, adibidez, zenbat hegazti eta zein espezie sakrifikatu ziren, edo Zentroa itxita egon den bitartean sarrera berriak nora bideratu diren. Eta, jakina, funtzionamenduaz ez dakigu ezer.
Eguzki behin baino gehiagotan kexatu da Foru Aldundiaren gardentasun ezaz, adibidez, eskopeta-tiroek suntsitutako espezie babestu edo ez-zinegetikoen kasuan. Ondo legoke, maiatzean gai honi buruz zabaldu genuen oharrean esaten genuen bezala, zentro berriak Diputazioak informazio-politika “irekiagoa” hartzeko ere balio izatea. Ondo legoke, bai, baina ez dirudi hala izango denik, erakutsitako gardentasun falgatik.
