Maddi Etxeberriak dilistazko pizza egiten erakutsi digu

Osagaiak (4 pertsonentzako):

• Oinarrirako:
  • 175 gramo dilista gorri
  • Belar probentzal koilaratxo bat
  • Gatz koilaratxo bat
• Topping gisa:
  • Kipula erdia
  • Piper berde italiano bat
  • 50 gramo soja texturizatu
• Saltsa egiteko:
  • Patata bat (150 gramo)
  • 3 azenario ertain
  • Limoi erdiren zukua
  • Gatz koilaratxo erdia
  • Baratxuri hauts koilaratxo erdia
  • Oliba olio koilaratxo bat

Nola egin:

• Oinarria:
  1. Lentejak pisatu ostean, beratzen eduki 12-16 orduz.
  2. Labea aurretik berotzen jarri 200ºC-tan, beroa goitik eta behetik duelarik.
  3. Lentejak uretatik pasa, ondo garbitu eta irabiagailuko ontzian sartu gatza eta belar probentzalekin batera eta ondo nahastu masa ia homogeneo bat lortu arte.
  4. Labeko erretilu batean labeko papera jarri eta masa gainean zabaldu, geruza homogeneo bat sortuz.
  5. Masa labekatu 25-28 minutuz (labearen arabera denbora aldatuko da).
  6. Denbora hori igarotakoan masari buelta eman eta beste 5 minutuz labekatu.
• Toppig-en prestaketa:
  1. Ura irakiten jarri soja texturizatua hidratatzeko.
  2. Bitartean, zartagina berotu eta kipula eta piperra zati txikietan moztuta sukaldatu.
  3. Soja testurizatua hidratatu paketean jartzen duenaren arabera, eta soja zartaginera gehitu eta pare bat minutuz dena nahastu, zaporeak nahas daitezen.
• Saltsa:
  1. Ura irakiten jarri.
  2. Azenarioa eta patata zuritu eta zatitu.
  3. Ura irakiten ari denean patata eta azenarioa egosi.
  4. Dena prest dagoenean, irabiagailuko ontzian jarri azenario eta patata egosia, gatza, limoi zukua, baratxuri hautsa eta olioa, eta dena irabiatu.
• Pizza:
  1. Lenteja-masari buelta eman (hasieran jarri dugun bezala gelditzeko) eta patata saltsa erdia masaren gainean jarri, masa osoan zehar.
  2. Une honetan, nahi izanez gero belar probentzal koilaratxo bat zabaldu daiteke saltsaren gainetik.
  3. Saltsaren gainetik soja, piperra eta kipula jarri eta geratzen den patata saltsa gainetik jarri.
  4. 5-10 minutuz labekatu.

Gainetik jarritako guztia zuen gustuen arabera moldatu dezakezue; espeziak aldatu, soja texturizatua oilaskoarengatik ordezkatu, piperraren ordez kalabazina bota, saltsa etxeko tomate saltsaz ordezkatu… Ez izan beldurrik oinarri gisa errezeta hau hartu eta zuen gustuetara moldatzeko!

Gure kulturan oso errotuta dago lekale zehatz batzuen kontsumoa (lenteja, garbantzua, babarruna, baba), baina beti modu berean egiten dira; eta errezeta honen bidez, betiko eskema horiek haustea da nire helburua. Errezeta hau bizitza osoan erabili eta kontsumitu ditugun lentejekin ere egin daiteke, baina aukerak zabaltze aldera, nik lenteja gorriekin egin dut (betiko lentejekin egin nahi izanez gero, prozedimendua berdina litzateke).

Lentejak zuntz iturri oso garrantzitsua dira. Zuntz gomendioa, egunean 30 gramotan (gutxi gora behera) kokatzen den bitartean, mendebaldeko kulturan bizi garen asko ez gara ia gomendioaren erdira ere iristen. Beraz, lekaleak (eta tartean lentejak) oso aproposak dira gure zuntz-ingesta igotzeko. Izan ere, zuntzaren onurak asko dira; hala nola, idorreria ekiditeko, dibertikulosiak izateko arriskua jaisteko, denbora luzeagoan asetuta mantentzeko, odolean LDL (kolesterol “txarra” bezala ezagutzen dena) jaisteko, odoleko glukosa-maila jaisteko eta abar.

Zuntzaz gain, bada lentejek ezagunak izateko duten beste nutriente bat, mikronutriente bat kasu honetan: burdina. Lentejak oso aberatsak dira burdinean, eta gure eguneko ingestara iristeko iturri garrantzitsu bat dira landare jatorriko elikagaien artean. Landare jatorriko burdinak, ordea, zailtasun handiagoa dauka hesteetan xurgatzeko, baina konponbide erraza dauka horrek: burdin kontsumoa C bitaminaren kontsumoarekin bateratzea. C bitaminan aberatsak dira zitrikoak, marrubiak, kiwia, piper gordina… Beraz aukera ona da aipatutako frutaren bat azkenburuko gisa sartzea plater honen ostean, edo piper gordindun entsalada batekin laguntzea.

Beraz ez izan beldurrik lekaleak zuen egunerokotasunean sartzeko; eta experimentatu sukaldean, betiko koilara-plater horietaz haratago, plater goxo, erraz eta osasuntsu ikaragarri baitago!