Udal Gobernu taldea
“Lehenbailehen irtenbide bat topatzeko lanean jarraitzeko borondate irmoa berresten dugu. Hurrengo egunetan ere bi aldeekin harremanetan jarraituko dugu, arazoari konponbidea emateko esperantzaz”, horixe adierazi dio Aiurriri Udal gobernu taldeak. Egoerak sortzen dituen eragozpenak direla eta, Udalak barkamena eskatu die herrikideei. Lan gatazka testuinguruan jartzeko saiakera egiten dute, igorritako oharrean: “Kiroldegiaren kudeaketa lehiaketa publiko bidez esleitu zion Udalak Bizkortzen enpresari eta enpresa horretako langileak dira greban daudenak. Gauzak horrela, Gobernu taldea ahalegin guztiak egiten ari da bilerak bultzatzeko eta bi aldeak ahalik eta azkarren akordio batera iristeko. Urnietako Udaleko gobernu taldea oso arduratuta dago kiroldegiko langileen greba dela eta urnietarrek ez dutelako herriko kirol instalazioak erabiltzeko aukerarik, horrek banakako zein taldekako erabiltzaile guztiei sortzen dizkien eragozpenekin. Gure esku dagoen guztia egiten ari gara egoera ahalik eta azkarren bideratzeko eta kiroldegia berriro herritarren zerbitzura izateko”.
Urnietako EH Bildu
Oposizioko lehen alderdiak “EAJk osatutako gobernu taldearen kudeaketa txarra”ri leporatu dio egun bizi den egoera. Neurriak hartzea eskatzen dio Udal gobernu taldeari: “EAJko udal gobernuari, bere ardura delako, orain arteko jarrera aldatu eta egoera lehen bait lehen konpontzeko benetako neurriak har ditzala eskatzen diogu”. Era berean, “greban dauden langileei babesa adierazi” die.
