Jaien aurretik Udalaren eta Txosna Batzordearen arteko talkak eragina izan du gizarte bizitzan. Zanpatuz elkarteak, esaterako, Mendi film jaialdian laguntzeari uko egingo diola iragarri du. Arrazoiak jarraian irakur daitezke, zabaldu duten mezuan:
Zanpatuz mendi elkarteak 2025 urtean Mendi Film-eko kolaboratzaile izateari uko egin dio
"Zanpatuz Mendi Elkartea aurten ez da Mendi Film emanaldiko kolaboratzailea izango, irailaren 24an Saroben eskainiko diren emanaldietan. Urnietako Txosna Batzordeak elkartasun eskaera egin zigun eta Batzordeak txosnak ez jartzea erabaki ondoren, eskaera horri baiezkoa ematea erabaki dugu. Zanpatuz mendi elkartetik mendi film-eko emanaldiak atzeratzea proposatu diogu Udalari, ekitaldi horiek herriko festetako egutegitik kanpo egiteko, baina Udalak ekitaldia mantentzea erabaki du.
Taldeko bazkide guztiei erabakiaren berri eman ondoren, zuen esku uzten dugu emanaldiak ikustera joateko erabakia".