Eduki ugariko ekitaldia antolatzen ibiliak ziren aurre egunetan herriko hainbat musikari eta dantzari, Jauregik ezer ez zekiela, eta ezustean harrapatu dute plazaren erdian.
Besteak beste, Maider Ziaurrizek idatzi hunkigarri bat irakurri du txistulari taldearen izenean, Jon Garmendiak poema osatu du harentzat, eta denen artean, "Antton Fantasia" izenburuko abesti berria estreinatu dute plazan.
Maider Ziaurrizen hitzartzea
"Maisu:
Zutaz dudan lehen oroitzapena ez dago musikari lotua, euskarari lotua baizik.
Zeniezazkidakeen, lekizuke eta ahalerazko beste hamaika aditz irakasten zenizkigun orduan.
"Antton-musika irakasle" binomio ia tautologikoa geroztikakoa da nire oroimenean.
Zure berezko dohainari jarraituz, espezializaziora jo zenuen, mintzaira batetik bestera, hitzetatik notetara, eta, notekin batera, txistu gozora.
Bete-betean murgildu zinen musikaren barrunbeetan, bizitzak melodia behar duela edo, agian, bizitza bera melodia bat dela pentsatuz. Besteek egindakoa errepikatzea ez zenuen aski, ordea, eta egia bila abiatu zinen orduan, kulturaren sorburura, gure nortasunaren sustraira.
Buruntza azpian ibili zinen aztarrika, Lurdes Iriondoren ondareari tiraka, eta Marizulon aurkitu zenuen lehen arrastoa, Etenetan eta Muliskon abaro oparoa, Idiazabal kalean zaldien trosta hots erritmikoa.
Sukar-ametsek harrapatuta bezala, jantzi dituzu Urnietako uneak eta bazterrak doinuz, eta anabasatik perfekziorako bidean, polifonia ederrak dituzu sortu, bertsioari bertsio, aurrekoa etengabe hobetuz, buruan entzuten dituzun doinuak gorpuztuz.
Langilea, eskuzabala, apala eta pertsona aparta, gaur txanbolinteruok esan nahi dizugu zorionak eta eskerrik asko, maisu, zuri esker gara gu.
Gora Txanbolin eta biba zu!".
Jon Garmendiaren poema
"Arbela bat
eta haurrak begira
maisu bat hizketan ari da
Ni naiz, zu zara...
bai
zu zarelako
gu bagara.
Hauts eta harri
gorputz eta haragi
Urnietan hasten da mundua
ikastola bat
maitasunez ehundua
gurasoak adreilu
ikasleak zutabe
irakasleak
teilatua
eta herriak lagundua.
Ez da soilik marmola Antton
pentsamendua da burdina
zu zara bihotzez egina
atea beti zabalik,
jakina.
Bagenuela urrea zenion
guk
distira duzula Antton
ari zarela batera
ala bestera
euskaraz
aurrera.
Hala zara
negu hotzean babesa,
uda luzean itzala
eguzki txistulari bat bueltaka
Etxean zaude Antton
arnasa zara
musika enea, doinuaren elea,
Zoriontasuna
pentagraman idatzia,
pasioa
maitasunez jantzia.
Lehen korrika
orain pausaz
baina beti zuzen Antton
eta sendo
lurrera erorita ere
irribarretsu altxa.
Hitz politen arbela zara
garamatzana
etxetik harago
musikarekin dena da alaiago
eta hori
ez du haizeak eramango.
Eskerrik asko, Antton
eskerrik asko,
gure bizitzaren erdian
gure ametsen lorategian
Jauregi eder bat zarelako!".
