Eguraldi ezin hobea egin zuen asteburuan eta kaleak gainezka zeuden. Konpartsa umeen oihu eta barre artean abiatu zen Andoain barrena; Juanita Alkain plazan, Zubiaurren, eta Zumea plazan geldialdiak egin zituzten. Erraldoi eta buruhandien konpartsa dultzaineroak lagunduta egin zuen aurrera. Bidean zehar, Aitor Mendiluze bertsolariak idatzitako bertsoak entzuteko aukera ere egon zen.
Andoaingo konpartsa egiteko garaian bi gai nagusi hartu zituzten: Pertsonaia historikoak erraldoien kasuan (Juan Legarra eta Cecilia Legarra, Azelaingo bikotea), eta Trentxikiko lanbideak buruhandien kasuan (mehatzaria, olagizona, ikazkina, estraperlista, makinista, geltokiko nagusia eta arrieroa). Gauzak horrela, Andoaingo ondarea herriarekin partekatu nahi izan zuten konpartsako kideek larunbatean.
