2006az geroztik egiten den omenaldi-ekitaldia da, Oroituz elkarteak antolatuta. Iazko argazki eta bideoak, ikusgai daude Aiurriren webgunean.
Gaurko ekitaldian, erail eta desagerrarazi zituzten 25 laguni lore eskaintza eskainiko zaie. Bertan, Maizorri Txalaparta eskolako kideek, Urkiko dantzariak (aurreskua), eta Bidasoaldeko Kepa Ordoki eta Oroituz elkarte memorialistek hitza hartuko dute.
"Maravillas" abestiaren bertsioa, Banda Errepublikanoaren eskutik
Ekitaldiaren bigarren zatian, Andoaingo Banda Errepublikanoak abesti antifaxistez osatutako musika-emanaldia eskainiko du, Joxe Mari Oiartzabalek zuzenduta. Besteak beste, Nafarroako memoria historiakoren aldeko kultur ondarean hizki larriz jartzen den "Maravillas" abestia interpretatuko dute, Aiurriri eskainitako elkarrizketan, Bandako kide diren Maripi Arruizek eta Merce Brauk adierazi zuten bezala. Oiartzabalek berak konposatutako “Justizia” abestia ere gaurko errepertorioan sartzeko asmoa dute.