Ondare historikoa berreskuratzea eta jakitera ematea xede duen Andoaingo elkartea aspalditik dabil geure arbasoen lanbideak, bizimodua eta pentsamendua islatuko dituen museoa antolatzen. Berriki, iazko urrian hain zuzen, aurkezpen ekitaldia antolatu zuen kideekin, ondareen emaileekin eta udal ordezkariekin.
Aurrez, 2022ko ekainean, Fermin Leizaola etnografo ospetsuaren bisitaldia izan zuten Burdinako kideek. Ikustaldi hartan harridura agertu zuen Leizaolak, txukun antolatutako pieza zaharren bilduma ikusgarria topatu baitzuen bertan.