El Señor de los goles izenburua duen erakusketak Real Oviedoren eta bilduma pribaturen baten jabetzako materialaz gain, Langara familiak utzitako argazki, argitalpen, domina eta objektu pertsonal ugari jarri ditu ikusgai.
Oviedo taldearen Fundazioak eta Asicom Iberoamerikar Fundazioak antolatu dute erakusketa. Beren hitzetan, “Isidro Langara, futbolean doktoratua eta golak egiteko artean bikain cum laude, Oviedoko Unibertsitatean sartu da orain, Real Oviedoko futbolariaren figura publiko zabalari hurbiltzen dion erakusketa antologiko handi baten bidez”.
Gogorarazi dutenez, “Langara Futboleko Historia eta Estatistikako Nazioarteko Federazioak Espainiako golegilerik onena izendatu du. Berea da, gaur egun ere, Espainiako Lehen Mailan partida bakoitzeko sartutako golen batez besteko onena eta Espainiako selekzioarekin sartutako golen batez besteko onena. Espainiako futbol maila goreneko hiru partidatan hat-trick-ak lortu dituen Ligako historiako futbolari bakarra da. Eta inork ez zuen berak bezain neurketa gutxi behar izan Espainiako Lehen Mailan ehun gol lortzeko”.
Erakusketa, Andoainen
Andoainen, golegile andoaindarren gaineko erakusketa iaz, otsailaren 15ean jarri zuten Basteron. Kronika, argazkiak eta bideoa, hemen.
Era berean, bi egun lehenago, otsailaren 13an "Osaba Isidroren maleta" ipuin musikalizatua taularatu zuten Basteron. Literatura eta musika uztartu zituzten aspaldiko ikono bati gerturatzeko asmoz.
Langararen iloba Junkal Guerrero musikaria izan zen ikuskizunaren bideratzailea, eta sortze-prozesuan ezinbestekoak izan ziren Juan Kruz Igerabide idazlea, Myriam Ulanga piano-jotzailea, Katrin Iturralde musika irakaslea eta Andoaingo Udal Musika Eskolako abesbatza txikia.