Iazko ekitaldiaren gaineko kronika, argazki-sorta eta bideoak ikusgai, hemen.
Txalaparta, bertsoak, ohorezko dantza eta hitzartzeak
Maizorri Txalaparta eskolako txalapartarien eta Punttuka bertso eskolako kideen esku-hartzearen eta Urkiko dantzari eta txistulariaren ohorezko dantzaren ondoren, lore-eskaintza egingo zaie faxismoak herrian eraildako eta desagerrarazitako 26 herritarrei. Biktimen senitartekoek Gotzon Etxeberria artistaren “Goiztirian, arimaren garrasia” eskulturaren aurrean egingo dute lore-eskaintza.
Segidan, Gasteizko Martxoak 3 eta Oroituz, Andoainen elkarteetako kideek hartuko dute hitza.
Gasteizko elkarteko kideak izango dira gonbidatu bereziak aurtengo Andoaingo ekitaldian; horrela, nolabaiteko aitortza egin nahi zaie, mende erdia tinkotasunez baitaramate egia eta justizia aldarrikatzen, poliziak Arabako hiriburuan hil zituen bost langileak eta zauritu zituen ehundik gora herritar gogoan hartuta. Pedro Maria Martinez Ocio, Francisco Aznar Clemente, Romualdo Barroso Chaparro, Jose Castillo Garcia, eta, Bienvenido Pereda Moral izan ziren eraildako langileak. Horiez gain, Gasteizko hilketengatik protesta egiten ari zirela hurrengo egunetan hil zituzten beste hiru lagunak ere (Juan Gabriel Rodrigo Knafo Tarragonan, Mario Marotta Erroman, eta, Vicente Anton Ferrero Basaurin) gogoratuko dituzte.
Berezia izan zen Gasteizen aurten egin zuten omenaldi-ekitaldia, gertaera odoltsuak izan zirenetik mende erdia igaro dela kontuan hartuta, eta argazkiez eta bideoez jositako kronika egin zuen Oroituz, Andoainen elkarteak Aiurriren webguneko Komunitate-aren atalean.
Campanades a morts
Azkenik, Andoaingo abeslariez eta musikariez osatutako Banda Errepublikanoaren txanda helduko da, ekitaldian. Abesti antifrankistak zabalduko dituzte Alfaro plazan, eta bereziki, Lluis Llach abeslariak Gasteizko sarraskia inspirazio-iturri izanda konposatu zuen Campanades a morts abestia ekarriko dute gogora. Sebastopoleko dantzariekin batera eskainiko dute memoria historikoaren kantutegian aparteko tokia hartzen duen abestia.
Andoaingo biktimen aldeko ekitaldian emanaldia egiteko espreski osatzen den taldea da Banda Errepublikanoa, eta Joxe Mari Oiartzabalek zuzentzen du.
Bazkaria, Kotoi elkartean
Frankismoaren biktimak oroitzeko egunari jarraipena emateko, Kotoi elkartean bazkaria antolatu du Banda Errepublikanoak. Izena eman behar da aurrez, Itsaso tabernan, eta apirilaren 15a jarri dute azken eguna horretarako. 25 euro balio du bazkarirako txartelak.
