Buru osasuneko arazoak dituzten pertsonekin harremana ez zaigu erraz egiten. Badira dohain berezia dutenak –inguruan baditut batzuk, eta miresten ditut–, gehienontzat, ordea, haiekiko hartu-emana zaila izaten da. Badelako halako muga edo ezintasuna eta, ezin uka, aurreiritzia. Jasaten duten estigma hori gainditzea da gizarteak duen erronkatakoa. Alberto Pecharroman ezagutu nuenetik, kalean, agurtzen genuen elkarri. Tarteka, kafea hartzen ari nintzela, aipamen bat edo beste egitera hurbiltzen zitzaidan. Beste hainbatetan, neronek sumatzen nuen burumakur.
Herenegun, goizalderarte, udaltzaingoa eta anbulantziak izan ziren Ortzaika aldean. Eta deia jaso nuen gero, hildakoa Alberto zela baieztatuz. Komunitate baten kide garen heinean, zor diogu aitortza: Andoainen oraindik ere irtenbiderik eman ez zaion borrokatxoa eraman zuen aurrera. 2020ko urriko albistea da, Xabier Lasa lankideak sinaturikoa: “Karrika auzoko Aiztondo kalea bukatu eta Etxeberrieta auzoko Martin Ugalde kalea hasten den eremuan, urte luzez bere horretan dirauen hesitura dago. Lurrazpira jaisteko aldapa zatar bat, lokal komertzialerako baimena izan eta garaje bilakatutako zazpi gunera iristeko”.
Bideoa argigarria da, oso. Eta, zoritxarrez, arazoak bere horretan dirau. Urte hauetan guztietan konponbidea topatu ezinik jarraitzen dute Eusko Jaurlaritzak, Andoaingo Udalak eta etxabeetako nahiz kalearen alde banatako garajeen jabeek. Noizbait gertatuko da ezbeharren bat eta damutuko zaigu arazoari lehenago irtenbidea aurkitu ez izana.
Alberto ez zen andoaindarra, sortzez, baina bertan integratzeko saiakera egin zuen. Esaterako, Burdina taldean boluntario gisa aritu zen lanean.
Afera horrekin zerikusirik ez duten beste borrokatxo batzuetan aritu zen. Badakit jomugan izan zituela politikari jakinak eta, hainbatetan, jokabide deitoragarria izan zuela. Seguru, buru osasuneko arazoaren ondorioz jokatu zuela horrela. Ez da, horrenbestez, egindakoa zuritzeko unea. Baina uste dut bakoitzari berea zor zaiola eta, akaso, noizbait, Etxeberrieta-Karrika muga horretan dagoen gabezia hori konponduko da. Agintaldi honetan izan daiteke: behar luke, luze gabe.
Aiurrikook gogoan izango dugu, bost urte atzera, Alberto Pecharromanen ekimena: komunitatearen alde, bertan bizi edo bertatik igarotzen diren haurren eta adinekoen alde, bereziki, irisgarritasuna eta bide-segurtasuna bermatzeko temati eta kementsu aritu izana.