Alde horretatik, Aiurri aldizkarian makina bat iritzi-artikulu idatzi zituen, gogoeta ugari plazaratuz horietan. Iritzi zutabegile izateaz gain, ekintzailea ere izan zen, eta hainbat gizarte ekimenetan parte hartzaile ikusi genuen azken bi hamarkadetan.
Esate batera, Urnietan bakea eta bizikidetza gaitzat hartuta azken urtetan antolatu izan diren jardunaldietan modu aktiboan aritu zen, beste zenbait urnietarrekin bizipenak partekatuz eta etorkizun baketsu bati begirako oinarriak ezarriz. Aiurrin idatzi izan zituen zutabeetako batean, aipatu izan zuen jardunaldi haien gainean.
Tortutatua
“Apaizak ere torturatuak” (2017, Intxorta 1937 Kultur Elkartea) liburuan bere testigantza pertsonala eman zuen Izagirrek. Han idatzita utzi zuen nola izan zen torturatua bi txandetan, elizgizon frantziskotarra izan zen garaitan, Eibarren 1968an eta Donostian 1969an. Nolanahi ere, Aiurri-ri eskaini zion elkarrizketan argi utzi zuen zer ez zuten nahi izan testigantza emaileek, “Gorrotoa, mendekua eta antzeko sentimenduak ez ditugu transmititu nahi izan”.
Zamoran Euskal Herriko apaiza errebeldeentzat espreski ireki zuten zentruan kartzelan zigorra bete behar izan zuen orduan Izagirrek. 1975ean aske utzi zuten, Franco hil eta berehalaxe.
Argentinan, justizia eske
Frankismoak eragindako krimenen aurka azken urtetan biktimek Argentinan ireki duten kausan pertsonatu zen Felipe Izagirre. Buenos Airesera joan zen beste hainbat biktimekin batera, eta Maria Servini epailearen aurrean bere testigantza pertsonala eman zuen.
Kereila horren aldeko aldarrikapen orotan parte hartu izan du azken urtetan, osasunak utzi izan dion heinean. 2014ko abenduan, adibidez, Andoaingo beste biktima batzurekin mahai-inguruan parte hartu zuen.
